ഇന്നത്തെ കുട്ടികൾക്ക് ഓൺലൈൻ ലോകം അവരുടെ നിത്യജീവിതത്തിന്റെ ഭാഗമായിമാറിക്കഴിഞ്ഞിരിക്കുന്നു. വിനോദത്തിനുവേണ്ടി മാത്രമല്ല പഠനത്തിനും ഒഴിവാക്കാനാവാത്ത ഒന്നായി അതു മാറിയിരിക്കുന്നുവെന്നതിനാൽ അത്തരമൊരു ലോകത്തിൽ നിന്ന് അവരെ അടർത്തിയെടുത്തുകൊണ്ടുപോരുക എന്നത് മാതാപിതാക്കൾക്കും അധ്യാപകർക്കും ഒന്നുപോലെ പ്രയാസമുള്ള കാര്യമാണ്. പക്ഷേ മക്കളെ പൂർണ്ണമനസ്സോടെ അത്തരമൊരു ലോകത്തിന്റെ പ്രയോക്താക്കളാക്കി മാറ്റുക എന്നതും അവരെ സംബന്ധിച്ചിടത്തോളം ബുദ്ധിമുട്ടുള്ള കാര്യമാണ്. കാരണം ദിവസംതോറും ഓൺലൈനുമായി ബന്ധപ്പെട്ട് വരുന്ന വാർത്തകൾ നല്ലതല്ല. മാതാപിതാക്കളുടെ മനസ്സിൽ വലിയ ആശങ്കയും സംശയവും സൃഷ്ടിക്കുന്നവയാണ് അവയെല്ലാം. സൈബർ കുറ്റകൃത്യങ്ങൾ, ചീത്തയായ ഉള്ളടക്കം, ഓൺലൈൻ ബുള്ളിയിംഗ്, സ്വകാര്യതാ ലംഘനം എന്നിവയെല്ലാം മാതാപിതാക്കളുടെ നെഞ്ചിടിപ്പ് കൂട്ടുന്നവയാണ്. ഇത്തരമൊരു സാഹചര്യത്തിൽ എന്താണ് ചെയ്യേണ്ടത് ?
ഓൺലൈൻ കുട്ടികൾക്ക് നല്കുന്നത് വിശാലമായ ലോകമാണ്; അറിവിന്റെയും അനുഭവങ്ങളുടെ വൻകരകളാണ്. പഠനസാമഗ്രികൾ, വിദ്യാഭ്യാസ വീഡിയോകൾ, ഗെയിമുകൾ, ഭാഷാ പഠനം, പുതിയ ലോകങ്ങളെ പരിചയപ്പെടൽ, പുതിയ അറിവുകൾ, സാങ്കേതികമായ മുന്നേറ്റങ്ങൾ എന്നിങ്ങനെ അറിവും പ്രതിഭയും വികസിപ്പിക്കാനുള്ള അനന്തമായ സാധ്യതകളാണ് ഇന്റർനെറ്റ് നൽകുന്നത്. സ്‌കൂളുകളിൽ തന്നെ ഓൺലൈൻ ഉപകരണങ്ങൾ പഠനത്തിന്റെ ഭാഗമായിമാറിയിരിക്കുന്നു. അധ്യാപകരുമായുള്ള സംവാദങ്ങൾ, പ്രൊജക്റ്റ് നിർമ്മാണം, വിവരശേഖരണം തുടങ്ങിയ മേഖലകളിൽ ഓൺലൈൻ സൗകര്യങ്ങൾ കുട്ടികളുടെ വളർച്ചയെ സഹായിക്കുന്നവയാണ്. അതുകൊണ്ടുതന്നെ മാറിയ സാഹചര്യത്തിൽ ഓൺലൈൻ പൂർണമായും തടയാൻ ശ്രമിക്കുന്നത് പ്രായോഗികമല്ല.
എന്നാൽ കുട്ടികൾ ഓൺലൈനിൽ നേരിടാൻ സാധ്യതയുള്ള അപകടങ്ങളും അവഗണിക്കാനാവില്ല. അനിയന്ത്രിതമായ ഓൺലൈൻ ഉപയോഗം മനോവൈകാരികാരോഗ്യത്തെ ബാധിക്കാൻ സാധ്യതയുണ്ട്. സാമൂഹികമാധ്യമങ്ങൾ വഴി താരതമ്യം, അംഗീകാരം തേടൽ തുടങ്ങിയവ കുട്ടികളിൽ സമ്മർദം സൃഷ്ടിക്കും. കൂടാതെ അപക്വമായ ഉള്ളടക്കങ്ങൾ, അശ്ലീല-വയലൻസ് വീഡിയോകൾ എന്നിവയിലേക്ക് ചിലപ്പോൾ അനായാസമായി പ്രവേശിച്ചേക്കാം. ഓൺലൈൻ ചതിക്കുഴികൾ, ഗെയിംസ് വഴി അടിമത്തം തുടങ്ങിയ സൈബർ ഭീഷണികളും യാഥാർത്ഥ്യമാണ്.
ഇക്കാര്യത്തിൽ മാധ്യമങ്ങളും ഒരുപരിധിവരെ കുറ്റക്കാരാണ്. കാരണം കുട്ടികളുമായി ബന്ധപ്പെട്ട സൈബർ കുറ്റകൃത്യങ്ങൾ, അപകടകരമായ വെല്ലുവിളികൾ, ദുരുപയോഗങ്ങൾ എന്നിവയെ കുറിച്ച് ഭീതിപകരുന്ന രീതിയിലാണ് മാധ്യമങ്ങൾ അവതരിപ്പിക്കുന്നത്. അപകടങ്ങളെ ശ്രദ്ധയിൽപ്പെടുത്തേണ്ടത് അത്യാവശ്യമാണെങ്കിലും ചിലപ്പോൾ ഇതിലൂടെ മാതാപിതാക്കളുടെ മനസ്സിൽ യാഥാർത്ഥ്യത്തേക്കാൾ കൂടുതലായ ഭയം വളരുന്നുണ്ട്. മുന്നറിയിപ്പുകൾ നല്ലതാണ് പക്ഷേ അത് പേടിപ്പെടുത്തുന്നവിധത്തിലായിരിക്കരുതെന്ന് മാത്രം. ഈ ഭയം മക്കളുടെ കാര്യത്തിൽ ഓൺലൈൻ കർശനമായി നിരോധിക്കുന്നതിലേക്ക് അവരെ കൊണ്ടുചെന്നെത്തിക്കുന്നു. പക്ഷേ ഓൺലൈൻ വഴിയായി വിനോദങ്ങളും അറിവും സ്വായത്തമാക്കിയ കുട്ടികൾ അത് സമ്മതിച്ചുതരുകയുമില്ല. മാതാപിതാക്കളും മക്കളും തമ്മിലുള്ള സംഘർഷത്തിന് ഇത് വഴിയൊരുക്കുന്നു.
യഥാർത്ഥത്തിൽ, കുട്ടികൾക്ക് ഓൺലൈൻ അനുവദിക്കണമോ വേണ്ടയോ എന്നത് പെട്ടെന്ന് പരിഹരിക്കാവുന്ന വിഷയം അല്ല. മറിച്ച് യുക്തിപരമായ നിയന്ത്രണത്തോടെയും ബോധവൽക്കരണത്തോടെയും മുന്നോട്ട് പോകേണ്ട വിഷയമാണ്. കുട്ടികളുടെ പ്രായം, മാനസികവളർച്ച, ഉത്തരവാദിത്വബോധം എന്നിവ വിലയിരുത്തി അനുയോജ്യമായ മാർഗനിർദേശങ്ങളോടെയായിരിക്കണം ഓൺലൈൻ ഉപയോഗിക്കാൻ മക്കളെ അനുവദിക്കേണ്ടത്. മാതാപിതാക്കൾക്ക് ഈ വിഷയത്തിൽ പ്രധാനമായും രണ്ട് നിലപാടുകളാണ് കാണുന്നത്. ചിലർ പൂർണമായ നിയന്ത്രണം ഏർപ്പെടുത്തുകയും, കുട്ടികളെ ഓൺലൈൻ ലോകത്തിൽ നിന്ന് പരമാവധി അകറ്റാൻ ശ്രമിക്കുകയും ചെയ്യുന്നു. ഇതിലൂടെ ചില അപകടങ്ങൾ കുറയ്ക്കാൻ സാധിക്കുമെങ്കിലും കുട്ടികൾ സാങ്കേതികവിദ്യകളിൽ പിന്നാക്കം പോകാനും, സാമൂഹികമായി ഒറ്റപ്പെടാനും സാധ്യതയുണ്ട്. മറ്റുചിലർ പൂർണമായ സ്വാതന്ത്ര്യം നൽകുകയും അവരെ സ്വയംനിയന്ത്രിക്കാൻ വിടുകയും ചെയ്യുന്നു. എന്നാൽ ഇതിൽ അപകടസാധ്യത കൂടുതലാണ്. പ്രത്യേകിച്ച് ചെറുപ്പത്തിൽ. അതിനാൽ ഈ രണ്ടു അറ്റങ്ങളിലുമല്ല പരിഹാരം, ഇടത്തരം മാർഗമാണ് കൂടുതൽ ഫലപ്രദം.
മാതാപിതാക്കൾ ഡിജിറ്റൽ ലോകത്തെ അടിസ്ഥാനമായി മനസ്സിലാക്കേണ്ടതും അത്യാവശ്യമാണ്. ഓൺലൈൻ പ്ലാറ്റ്ഫോമുകൾ, സുരക്ഷാ ക്രമീകരണങ്ങൾ, സ്വകാര്യതാ ഓപ്ഷനുകൾ എന്നിവയെക്കുറിച്ച് മാതാപിതാക്കൾക്ക് അറിയാമെങ്കിൽ മാത്രമേ കുട്ടികളെ ഫലപ്രദമായി ഗൈഡ് ചെയ്യാൻ അവർക്കാകൂ. രണ്ടാമതായി, ഓൺലൈൻ ഉപയോഗത്തെ സംബന്ധിച്ച് വ്യക്തമായ ചട്ടങ്ങളും സമയപരിധികളും നിർണ്ണയിക്കുന്നതും പ്രധാനമാണ്. പഠനത്തിനായി, വിനോദത്തിനായി, സാമൂഹിക ബന്ധത്തിനായി പ്രത്യേകം സമയം നിശ്ചയിക്കുന്നത് നിയന്ത്രണവും സ്വാതന്ത്ര്യവും ഒരുമിച്ച് നിലനിർത്താൻ സഹായിക്കും.
പരസ്പരവിശ്വാസം അത്യാവശ്യമാണ്. മാതാപിതാക്കൾ കുട്ടികളുമായി തുറന്ന ആശയവിനിമയം പുലർത്തുകയും അവർ ഓൺലൈനിൽ നേരിടുന്ന അനുഭവങ്ങൾ പങ്കുവയ്ക്കാൻ പ്രോത്സാഹിപ്പിക്കുകയും വേണം. ഭീഷണിപ്പെടുത്തുന്ന സമീപനം കുട്ടികളെ കാര്യങ്ങൾ മറയ്ക്കാൻ പ്രേരിപ്പിക്കും. എന്നാൽ പിന്തുണയും മനസ്സിലാക്കലുമുള്ള സമീപനം അവരെ സുരക്ഷിതരാക്കും.
സമൂഹമാധ്യമങ്ങളിലെ സെൻസേഷണൽ വാർത്തകളെ അടിസ്ഥാനമാക്കി മാത്രം തീരുമാനങ്ങൾ എടുക്കാതെ യാഥാർത്ഥ്യബോധത്തോടെ വിഷയത്തെ സമീപിക്കണം. ഭീഷണികൾ യാഥാർത്ഥ്യമാണെങ്കിലും, പരിഹാരങ്ങൾ ഉണ്ട്. ഉത്തരവാദിത്വമുള്ള ഓൺലൈൻ വിദ്യാഭ്യാസം, നിയന്ത്രിത ആക്സസ്, മാതാപിതൃ പങ്കാളിത്തം എന്നിവയിലൂടെ കുട്ടികളെ സുരക്ഷിതമായും ബുദ്ധിപൂർവ്വമായും ഡിജിറ്റൽ ലോകത്തിലേക്ക് കൈപിടിച്ചുകൊണ്ടുപോകാനാവും.
