ആരോഗ്യമുള്ള ശരീരത്തിന് ആരോഗ്യമുള്ള മനസ്സും വേണം. മനസ്സ് വെച്ചാല്‍ രോഗങ്ങളെ പടിക്ക് പുറത്താക്കാമെന്നു ചുരുക്കം. എന്നാല്‍ മനസ്സ് മാത്രം പോരാ, മടി മാറ്റി ചിട്ടയായി വ്യായാമം ചെയ്യുന്നതിനും മനസ്സുറപ്പുകൂടി വേണം. ആരോഗ്യകരമായ ഒരു ജീവിതം വേണമെന്ന് ആഗ്രഹമുണ്ടെങ്കില്‍ ഈ കാര്യങ്ങള്‍ ശ്രദ്ധിക്കൂ:-
വ്യായാമം മറക്കല്ലേ…
വ്യായാമം ഹൃദയപേശികളെ ബലമുള്ളതാക്കും. നല്ല കോളസ്ട്രോളായ എച്ച് ഡി എല്‍ കൂട്ടുകയും, ചീത്ത കോളസ്ട്രോള്‍ ആയ എല്‍ ഡി എല്‍ കുറയ്ക്കുകയും ചെയ്യും. വ്യായാമം അമിതവണ്ണം കുറയ്ക്കുകയും, മാനസികസമ്മര്‍ദ്ദം ലഘൂകരിച്ച് മാനസികാരോഗ്യം മെച്ചപ്പെടുത്തുകയും ചെയ്യുന്നു.
- ഹൃദ്രോഗങ്ങള്‍, പ്രമേഹം, അമിതരക്തസമ്മര്‍ദ്ദം, നടുവേദന, സന്ധിരോഗങ്ങള്‍, വൃക്കസംബന്ധമായ രോഗങ്ങള്‍, ഉയര്‍ന്ന കൊളസ്ട്രോള്‍, ദുര്‍മേദസ്സ് തുടങ്ങിയ പ്രശ്നങ്ങളുള്ളവര്‍ മെഡിക്കല്‍ ചെക്കപ്പ് നടത്തിയ ശേഷം ഡോക്ടറുടെ നിര്‍ദ്ദേശാനുസരണം മാത്രം വ്യായാമം ചെയ്യുക.
- അയവുള്ള വസ്ത്രങ്ങള്‍ ധരിച്ചു വേണം, വ്യായാമം ചെയ്യാന്‍. കൃത്യമായ അളവിലുള്ള ക്യാന്‍വാസ് ഷൂസ് ധരിച്ചുള്ള വ്യായാമം കാലുകളെയും, സന്ധികളെയും സംരക്ഷിക്കും.
- ദിവസവും കൃത്യസമയത്ത് വ്യായാമം ചെയ്യുന്നതാണ് കൂടുതല്‍ നല്ലത്. ആഹാരം കഴിച്ച് കുറഞ്ഞത് രണ്ടു മണിക്കൂറിനു ശേഷമെ വ്യായാമം ചെയ്യാവു.
ചിട്ടയോടെ ഭക്ഷണം കഴിക്കാം
- ധാന്യങ്ങള്‍, പയറുവര്‍ഗ്ഗങ്ങള്‍, പച്ചക്കറികള്‍, പഴവര്‍ഗ്ഗങ്ങള്‍, മത്സ്യം തുടങ്ങിയ വിവിധയിനത്തില്‍പെട്ട ആഹാരം ശീലമാക്കുക. പഴങ്ങളും പച്ചക്കറികളും വേവിക്കാതെ പച്ചയോടെ കഴിക്കുന്നത് ഉത്തമമാണ്.
- ഭക്ഷണത്തില്‍ ഉപ്പ്, മധുരം എന്നിവയുടെ അളവ് കഴിവതും കുറയ്ക്കുക. കഴിവതും വീട്ടില്‍ പാകം ചെയ്യുന്ന ആഹാരസാധനങ്ങള്‍ ഉപയോഗിക്കുക.
- നാരുകള്‍ (ഫൈബറുകള്‍) അടങ്ങിയ ഭക്ഷണം ശീലമാക്കുക. ഓട്സ്, പഞ്ഞപ്പുല്ല്, ഉലുവ, കടല, സോയാബീന്‍, മുതിര, ഇലക്കറികള്‍, പേരയ്ക്ക, ഈന്തപ്പഴം, നെല്ലിക്ക, ആപ്പിള്‍, ഓറഞ്ച്, മാതളനാരങ്ങ, ഇവയിലെല്ലാം നാരുകള്‍ അടങ്ങിയിട്ടുണ്ട്. കൊളസ്ട്രോള്‍ നിയന്ത്രിക്കാനും, അമിതവണ്ണം തടയാനും രക്തത്തിലെ പഞ്ചസാരയുടെ അളവ് നിയന്ത്രിക്കാനും സഹായിക്കുന്നു.
- അത്താഴം ലഘുവായി കഴിക്കുക. ഭക്ഷണശേഷം ഉടനെ കിടന്നുറങ്ങരുത്. തലച്ചോറിന്‍റെയും, മറ്റും പ്രവര്‍ത്തനത്തിന് വേണ്ട ഊര്‍ജ്ജം പ്രഭാതഭക്ഷണത്തില്‍നിന്നും ലഭിക്കേണ്ടതുകൊണ്ട് അതൊഴിവാക്കരുത്. അമിതാഹാരം ഒഴിവാക്കുക. അമിതാഹാരം ദുര്‍മേദസ്സ്, കൊളസ്ട്രോള്‍, ഉയര്‍ന്ന രക്തസമ്മര്‍ദ്ദം, ഹൃദയാഘാതം എന്നിവയ്ക്ക് കാരണമാകും.
