പ്രവര്‍ത്തനത്തില്‍ മേന്മ കൈവരിക്കാന്‍ കൂടുതല്‍ നേരം ചെലവിടുന്നതല്ല കാര്യം. സമയം കുറച്ച്, കാര്യക്ഷമത മെച്ചപ്പെടുത്തുന്നതാണ്.
- എപ്പോഴും ബിസിയാണെന്നു ഭാവിച്ചു തിടുക്കപ്പെടാതെ, ശാന്തമായി പ്രവര്‍ത്തിക്കുക, കാര്യങ്ങള്‍ ചെയ്യുക.
- ഏകാഗ്രത പുലര്‍ത്തുക. ഒന്ന് ചെയ്യുമ്പോള്‍ മറ്റൊന്നിലേയ്ക്ക് മനസ്സ് ചാടിപ്പോകാതെ നോക്കുക.
- ഒരുമിച്ചു ചെയ്യാവുന്ന കാര്യങ്ങള്‍ അങ്ങനെ ചെയ്യുക. ട്രെയിന്‍ യാത്രയും, പുസ്തക വായനയും ഒരുമിച്ചാകാം. റേഡിയോ കേട്ടുകൊണ്ട് പാചകമാകാം.
- തിരയല്‍നേരം കുറയ്ക്കുക. “എന്റെ കണ്ണട കണ്ടോ?”, “മൊബൈല്‍ എവിടെ?”, “ആ ഫയല്‍ ഏത് അലമാരയിലാണ്?” തുടങ്ങിയ ചോദ്യങ്ങള്‍ അലക്ഷ്യമായ പ്രവര്‍ത്തനശൈലിയുടെ ഫലമാണ്. രണ്ടു ലക്ഷം വാക്കുകളുള്ള നിഘണ്ടുവിലെ ഏത് വാക്കും ഒരു മിനിട്ടിനകം തിരഞ്ഞെടുക്കാന്‍ കഴിയുന്നത് അവ കൃത്യമായ ക്രമത്തില്‍ അടുക്കിയതുകൊണ്ടാണല്ലോ.
- ജോലിസ്ഥലത്ത് അനാവശ്യമായി വന്നു സമയം മെനക്കെടുത്തുന്ന അതിഥികളെ നിരുത്സാഹപ്പെടുത്തുക.
- ഏറെ നേരം വേണ്ടിവരുന്ന കൃത്യങ്ങള്‍ക്ക് നേരത്തിന്റെ വലിയൊരു ബ്ലോക്ക് നീക്കിവെച്ച്, അതുമാത്രം ആ വേളയില്‍ ചെയ്തു തീര്‍ക്കുക.
- ജോലി തീര്‍ത്ത് മടങ്ങുന്നതിനു മുമ്പ് പിറ്റേന്ന് ചെയ്യാനുള്ള കൃത്യങ്ങളുടെ ലിസ്റ്റ് തയ്യാറാക്കി, മുന്‍ഗണനാക്രമത്തില്‍ അടുക്കിയെഴുതുക. കൂടുതല്‍ വിഷമമുള്ള കൃത്യങ്ങള്‍ ആദ്യമാദ്യം എന്ന രീതിയിലാവണം ലിസ്റ്റ്.
- കൂടെക്കൂടെ ആവശ്യം വരുന്ന മേല്‍വിലാസങ്ങള്‍, ഇ-മെയില്‍ വിലാസങ്ങള്‍, ഫോണ്‍ നമ്പരുകള്‍ എന്നിവ കൃത്യമായി സൂക്ഷിക്കുക.
- പല സ്ഥലങ്ങളില്‍ പോകേണ്ട സാഹചര്യത്തില്‍ കുറഞ്ഞ സമയം കൊണ്ട് എല്ലായിടത്തും എത്താനാവും വിധം യാത്രയുടെ ആസൂത്രണം ചെയ്യുക.
- ഓഫീസ് വിട്ടുപോകുന്നതിനു മുമ്പ് മേശപ്പുറം ക്ലീന്‍ ആക്കുക. ഫയലുകളും, ബില്ലുകളും മറ്റും അന്നന്ന് തീര്‍ക്കുക.
- ഏതു കാര്യവും പരിപൂര്‍ണ്ണമാകണമെന്ന വാശി ഉപേക്ഷിക്കുക.
- കത്തുകളുടെയും, ഇ-മെയിലുകളുടെയും നീളം കുറയ്ക്കുക.
- ടെലിഫോണ്‍ സംഭാഷണം നീണ്ടുപോകാതെ സൂക്ഷിക്കുക. വിവരങ്ങള്‍ തേടാനോ, അറിയിക്കാനോ ആണ് വിളിക്കുന്നതെങ്കില്‍, പ്രസക്തമായ കാര്യങ്ങള്‍ കുറിച്ചു വെച്ചിട്ടുമാത്രം ഫോണെടുക്കുക.
- ജോലിസ്ഥലത്ത് എന്നും വൈകാതെയെത്തുക. സമയനിഷ്ഠ പാലിക്കുക. ഒന്നും മാറ്റി വെയ്ക്കാതെ അപ്പപ്പോള്‍ ചെയ്യുന്നത് ശീലമാക്കുക.
