പലരെയും പലകാരണങ്ങള്‍ കൊണ്ടും പിടികൂടുന്ന ഒന്നാണ് ഉറക്കക്കുറവ്. എന്നാല്‍ ജീവിതരീതിയില്‍ ചെറിയ മാറ്റങ്ങള്‍ വരുത്തിയാല്‍ ഒരുപരിധി വരെ ഉറക്കക്കുറവ് പരിഹരിക്കാന്‍ കഴിയും. അതിലൊന്നാണ് കൃത്യസമയത്ത് ഉറങ്ങാന്‍ കിടക്കുന്നത്.
അവിചാരിചതമായ കാരണങ്ങളൊഴിച്ച് മിക്കദിവസവും കിടക്കാന്‍ പോകുന്നതിനും ഉറങ്ങിയെണീല്ക്കുന്നതിനും കൃത്യസമയം നിശ്ചയിക്കണം. അതനുസരിച്ച് ശരീരം പിന്നീട് പ്രതികരിച്ചുതുടങ്ങും. രാത്രിയില്‍ കിടക്കാന്‍ പോകുന്നതിന് മുമ്പ് ഒരു ഗ്ലാസ് പാല്‍ കുടിക്കുന്നതും നല്ലതാണ്. പാല്‍ കുടിക്കണം എന്ന് മാത്രമല്ല വൈകുന്നേരത്തിന് ശേഷം കാപ്പിയോ മദ്യമോ കുടിക്കാതിരിക്കാനും ശ്രദ്ധിക്കണം. ഉറങ്ങാന്‍ പോകുന്നതിന് മുമ്പ് ടിവി കാണലോ മൊബൈല്‍ ഫോണോ വേണ്ട. മൊബൈല്‍ ഫോണില്‍ നിന്നുള്ള പ്രകാശം കണ്ണുകള്‍ക്ക് അസ്വസ്ഥത സമ്മാനിക്കുകയും അത് ഉറക്കത്തിന് തടസ്സമാകുകയും ചെയ്യും.
ഉറങ്ങാന്‍ പോകുന്നതിന് മുമ്പ് മൊബൈല്‍ തലയുടെ ഭാഗത്ത് നിന്ന് മാറ്റിവയ്ക്കാനും ശ്രദ്ധിക്കണം. വ്യായാമം, യോഗ എന്നിവ പരിശീലിക്കുന്നത് ഉറക്കത്തിന് ഏറെ ഗുണം ചെയ്യും. പ്രധാനമായും ശ്രദ്ധിക്കേണ്ട മറ്റൊരു കാര്യം ഭക്ഷണം കഴിച്ചയുടന്‍ ഉറങ്ങാതിരിക്കുക എന്നതാണ്. ഇത്തരം കാര്യങ്ങളില്‍ ശ്രദ്ധ കൊടുക്കുകയാണെങ്കില്‍ ഉറക്കം അകലെയല്ലാതിരിക്കും. തീര്‍ച്ച
