ജോലിയെക്കുറിച്ചുള്ള സങ്കല്പങ്ങൾ മാറി മറിഞ്ഞുകൊണ്ടിരിക്കുകയാണ്. പ്രത്യേകിച്ച് കൊറോണ വൈറസ് വ്യാപനത്തിന്റെ ഇക്കാലത്ത്. വൈറസിനെ പ്രതിരോധിക്കാൻ ജോലിക്കായി ഓഫീസിലെത്തേണ്ടതെന്നും വീട്ടിലിരുന്ന് ജോലി ചെയ്താൽ മതിയെന്നും മൾട്ടി നാഷനൽ കമ്പനികൾ പോലും സ്റ്റാഫുകൾക്ക് നിർദ്ദേശം നല്കിക്കഴിഞ്ഞു. കൊറോണ കാലത്തിന് മുമ്പ് തന്നെ വീട്ടിലിരുന്ന് കാര്യക്ഷമമായി ജോലി ചെയ്യുന്ന പലരുമുണ്ട് നമ്മുടെ നാട്ടിൽ പോലും. വീട്ടിലിരുന്നാൽ ജോലി ചെയ്യാൻ കഴിയുമോയെന്ന് ചിലർക്കെങ്കിലും സംശയമുണ്ടാവാം. ചില കാര്യങ്ങളിൽ ശ്രദ്ധ കൊടുത്താൽ ഓഫീസിലെന്നതുപോലെ വീട്ടിലിരുന്നും ജോലി ചെയ്യാം.
കൃത്യമായ സമയം നിശ്ചയിച്ച് അതനുസരിച്ച് ജോലി ചെയ്യുക എന്നതാണ് പ്രധാനം. വീട്ടിലല്ലേ എപ്പോൾ വേണമെങ്കിലും ജോലി ചെയ്യാമല്ലോ എന്ന അലസസമീപനം പാടില്ല. കൃത്യമായ സമയം നിശ്ചയിച്ച് ഉത്തരവാദിത്തത്തോടെ വേണം ജോലി ചെയ്യേണ്ടത്. കുടുംബാംഗങ്ങളുമായി സംസാരിച്ച് സമയം പാഴാക്കുകയോ ഫോൺ, സോഷ്യൽമീഡിയ എന്നിവ അമിതമായി ഉപയോഗിക്കുകയോ ചെയ്യരുത്. ആരും നിയന്ത്രിക്കാനില്ലല്ലോ, ആരും ചോദ്യം ചെയ്യാനില്ലല്ലോ എന്നു വിചാരിച്ച് ജോലിയിൽ ആത്മാർത്ഥതയില്ലായ്മകാണിക്കരുത്. ജോലി ചെയ്യുന്ന സ്ഥലം പ്രധാനപ്പെട്ടതാണ്. സുഖകരമായ അന്തരീക്ഷത്തിൽ മാത്രമേ കൂടുതൽ നന്നായും ക്രിയാത്മകമായും ജോലി ചെയ്യാൻ കഴിയൂ. നല്ല വേഷത്തിൽ വേണം വീട്ടിലായാലും ജോലി ചെയ്യാൻ.
ഓഫീസ് ജോലിക്ക് മാത്രമേ ബ്രേക്ക് പാടുള്ളൂ എന്ന് കരുതരുത്. വീട്ടിലിരുന്ന് ജോലി ചെയ്യുമ്പോഴും ഇടവേളയുണ്ടായിരിക്കണം. കുട്ടികളുണ്ടെങ്കിൽ അവരുമായി സംസാരിക്കാനും കളിക്കാനും സമയം ചെലവഴിക്കാം. അത് ജോലി ചെയ്യാൻ കൂടുതൽ എനർജി നല്കും. എന്നും സ്ഥിരമായി വീട്ടിലിരുന്ന് ജോലി ചെയ്യുന്നവർക്ക് സ്വഭാവികമായും പിടിപെടാവുന്ന ഒന്നാണ് ഏകാന്തത.
താൻ ഐസൊലേറ്റഡാണെന്ന ചിന്ത അവരെ പിടികൂടും. അതിൽ നിന്ന് മോചിതരാകാൻ മറ്റുള്ളവരുമായി ഇടപെടുകയും സംസാരിക്കുകയും വേണം. ഭക്ഷണകാര്യങ്ങളിലും ശ്രദ്ധയുണ്ടായിരിക്കണം. കൃത്യമായി ഭക്ഷണം കഴിക്കാനും വെള്ളം കുടിക്കാനും സമയം കണ്ടെത്തുകയും വേണം.
കമ്പനികൾക്ക് സാമ്പത്തികനേട്ടമുണ്ടാക്കാനും കഴിയുന്ന ഒന്നാണ് വീട്ടിലിരുന്നുള്ള ജോലി. സ്വന്തമായി കെട്ടിടമോ വാടക കെട്ടിടമോ ഒന്നും ഇവിടെ ആവശ്യമില്ല. ഇലക്ട്രിസിറ്റി പോലെയുള്ള ചെലവുകളുമില്ല. ആത്മാർത്ഥതയോടെയും ചിട്ടയോടെയും വീട്ടിലിരുന്ന് ഓഫീസ് ജോലികൾ ചെയ്യുന്നവർക്ക ഉചിതമായ സമയം കൂടിയാണ് ഇത്. രാവിലെയും വൈകുന്നേരവും തിരക്കുപിടിച്ചുള്ള യാത്രകളും മടക്കയാത്രകളും ടെൻഷനും ട്രാഫിക് ബ്ലോക്കും അലച്ചിലും ഒന്നും ഇല്ലാതെ സ്വസ്ഥമായി വീട്ടിലിരുന്ന് ജോലി ചെയ്യാം. ഓഫീസ് ജോലികൾ പലതും വീട്ടിലേക്ക് മാറ്റുന്ന കാലം സമീപഭാവിയിലുണ്ടായേക്കാം.
