ലോകജനസംഖ്യയിലെ 30. 2 ശതമാനത്തിലേറെ വ്യക്തികളെയും ബാധിച്ചിരിക്കുന്ന ഒരു അസുഖമായി ഫാറ്റിലിവർ അതിൽ തന്നെ നോൺ ആൽക്കഹോളിക് ഫാറ്റിലിവർ ഡിസീസ് (NAFLD) മാറിയിരിക്കുന്നു. അമിതമായ മദ്യപാനമില്ലാതെ തന്നെ കരളിൽ അമിതമായി കൊഴുപ്പ് അടിഞ്ഞുകൂടൂന്ന അവസ്ഥയാണ് ഇത്. പ്രധാനമായും പൊണ്ണത്തടി, ടൈപ്പ് 2 പ്രമേഹം, മെറ്റബോളിക് സിൻഡ്രോം എന്നിവയുമായിട്ടാണ് ഇത് ബന്ധപ്പെട്ടിരിക്കുന്നത്. കൃത്യ സമയത്ത് കൃത്യമായ രീതിയിലുള്ള പരിശോധനകളും ചികിത്സകളും നടത്തിയില്ലെങ്കിലും നിശബ്ദമായി നമ്മെ ആക്രമിച്ചുകീഴടക്കാനുള്ള എല്ലാവിധ സാധ്യതകളും ഈ രോഗത്തിനുണ്ട്. പ്രത്യേകിച്ച് സിറോസിസ്പോലെയുള്ള ഗുരുതരപ്രശ്നങ്ങൾക്ക്. ചില ലക്ഷണങ്ങളിലൂടെ ഈ രോഗാവസ്ഥ മനസ്സിലാക്കിയാൽ മതിയായ ചികിത്സ നേടി സുരക്ഷിതത്വം കൈവരിക്കാവുന്നതാണ്.
ഉറക്കക്കുറവ് മതിയായ ഉറക്കമില്ലായ്മ ഫാറ്റിലിവർ രോഗികളിൽ പൊതുവെ കണ്ടുവരുന്ന ഒന്നാണ്. തുടർച്ചയായ രാത്രികളിൽ ഉറങ്ങാൻ കഴിയാത്തതുമൂലം കരൾവീക്കമുണ്ടാവുകയും കരളിന് ഗ്ലൈക്കോജൻ സ്റ്റോർ ചെയ്യാനും പുറത്തുവിടാനുമുള്ളകഴിവു കുറയുകയും ചെയ്യുന്നു. അടിവയറിനുണ്ടാകുന്ന അസ്വസ്ഥതകളാണ് മറ്റൊന്ന്. പ്രത്യേകിച്ച് രാത്രികളിൽ. വിശപ്പുകുറയുക, ഭക്ഷണത്തോടു താല്പര്യക്കുറവ് അനുഭവപ്പെടുക, തൂക്കംകുറയുക എന്നിവയും സാധാരണയായി കണ്ടുവരുന്ന ലക്ഷണമാണ്. മാനസികമായ തളർച്ച, ശ്രദ്ധകേന്ദ്രീകരിക്കാൻ കഴിയാതെവരിക, ഓർമ്മക്കുറവ്, ആശയക്കുഴപ്പം എന്നിവയും പ്രധാനപ്പെട്ട ലക്ഷണങ്ങളാണ്. കാലുകളിലും കാല്പാദങ്ങളിലും കാണുന്ന നീര്. ചൊറിച്ചിൽ, മഞ്ഞപ്പിത്തരോഗികളിലെന്നതുപോലെ ത്വക്കിലും കണ്ണിലും കാണപ്പെടുന്ന മഞ്ഞനിറം തുടങ്ങിയവയും ഫാറ്റിലിവർ ഗുരുതരമാകുന്നതിന്റെ ലക്ഷണങ്ങളാണ്. ബാലൻസഡ് ഡയറ്റ്, തുടർച്ചയായ വ്യായാമം, മദ്യപാനവും പുകവലിയും ഉപേക്ഷിക്കൽ തുടങ്ങിയവയിലൂടെ രോഗവിമുക്തി നേടാനാവും. ഇതിനെക്കാളെല്ലാം അടിയന്തിരമായി ചെയ്യേണ്ടത് മുകളിൽപ്പറഞ്ഞ രോഗലക്ഷണങ്ങൾ പ്രത്യേകിച്ച് രാത്രികാലങ്ങളിൽ കൂടുതലായി അനുഭവപ്പെടുന്നുണ്ടെങ്കിൽ എത്രയും പെട്ടെന്ന് ഡോക്ടറെ കാണുകയും ചികിത്സ നടത്തുകയുമാണ് വേണ്ടത്.
(കടപ്പാട്: ഇന്റർനെറ്റ്)
