ചിറ്റാട

മക്കളില്ലെന്ന കുറ്റപത്രംകേട്ട്
ഇന്നലെയും അഭിനയിച്ച് ചിരിച്ചു..
അവളുടെ കണ്ണുനിറയുന്നതിന് പകരം
ഗർഭപാത്രം നിറഞ്ഞിരുന്നെങ്കിൽ..?
‘സ്തന്യ’മെന്ന സാഹിത്യം വായിച്ച്
കുഞ്ഞിച്ചുണ്ട് ചേരാത്ത മുലകൾ കാണുമ്പോൾ
പാൽഞരമ്പുകളിലെ വേനലിനെ
മനസ്സിൽ തെറി പറഞ്ഞു..
എന്നാണ് കുഞ്ഞുടുപ്പുകൾ
മഴയ്ക്കുമുമ്പേ കുടഞ്ഞെടുക്കുന്നത്?
വേതിട്ടു കുളിച്ചവളുടെ
പതിഞ്ഞ സ്വരം കൊണ്ട്
നീലാംബരി കേൾക്കുന്നത്?
മച്ചനെന്ന പരിഹാസ വിളികളിൽ
പൊട്ടിയ കളിപ്പാട്ടം പോലെ
സിമന്റു തണുപ്പിൽ,നടുക്കത്തെ മുറിയിൽ
അനങ്ങാതെ കിടക്കാം
കൗരവരുടെ അമ്മയും അച്ഛനും
ഗതികേടില്ലാത്തവരെന്നു കരുതി
ചുമ്മാ പുരാണം ചികയാം.
ജോലി കഴിഞ്ഞെത്തുന്ന നേരം നോക്കി
സങ്കടം തൂത്ത് ദൂരെക്കളഞ്ഞ്
അവളെയും കൂട്ടി കുടുംബത്ത് പോണം.
അനിയന്റെ കുഞ്ഞിന് അലുക്കുവെച്ചൊരു
ചിറ്റാട വാങ്ങിക്കൊടുത്ത്
അവസാന വണ്ടിക്ക് തിരികെപോരാം.
അവൾ വരാതിരിക്കില്ല!

സിബി അമ്പലപ്പുറം