യുവ ബാങ്കുദ്യോഗസ്ഥയുടെ ആത്മഹത്യ ജോലി ഏല്പിക്കുന്ന സമ്മർദ്ദങ്ങളെക്കുറിച്ചുള്ള തുറന്ന ചർച്ചയ്ക്ക് ഇതിനകം വഴിതെളിച്ചിട്ടുണ്ട്. ഏതെങ്കിലും ഒരു പ്രത്യേക തരം ജോലി ചെയ്യുന്നവർക്ക് മാത്രമുള്ളതല്ല ജോലിയിലെ സമ്മർദ്ദങ്ങൾ എന്നതാണ് ഒരു യാഥാർത്ഥ്യം. എന്നാൽ ചില പ്രത്യേക ജോലി ചെയ്യുന്നവർക്ക് ആ സമ്മർദം കടുത്തതായിരിക്കും എന്നു മാത്രം. മാർക്കറ്റിങ് എക്സിക്യൂട്ടീവായും മറ്റും ജോലി ചെയ്യുന്നവരുടെ സമ്മർദങ്ങൾ കനത്തതാണ്. ഏറിയും കുറഞ്ഞും എല്ലാ ജോലികൾക്കും അതിന്റേതായ സമ്മർദമുണ്ട്.
ആഴ്ചയിലൊരു ദിവസമുള്ള ഓഫ് ഡേ ഒരർത്ഥത്തിൽ വീണ്ടും എനർജി ചാർജ് ചെയ്യാനുള്ള അവസരമാണ്. അതുപോലെ അവധിദിനങ്ങൾ. എന്നാൽ ചില ജോലികളിൽ അതുപോലും നിഷേധിക്കപ്പെടുന്ന സാഹചര്യങ്ങളുണ്ട്. ജോലിയോടുള്ള ആത്മാർത്ഥതയും ജോലിയിലുളള സന്തോഷവും പ്രധാനപ്പെട്ട ഒരു കാര്യമാണ്. ഇഷ്ടമില്ലാത്ത ജോലി ചെയ്യുന്നവർക്കൊരിക്കലും ജോലിയിൽ സന്തോഷം കണ്ടെത്താൻ കഴിയില്ല. അതുപോലെ തൊഴിലിടങ്ങളിൽ ആരോഗ്യകരമായ സൗഹൃദബന്ധങ്ങൾ രൂപപ്പെടുത്തിയിട്ടില്ലാത്ത ഒരാൾക്കും അവിടെ തുടരാൻ കഴിയില്ല. ഓരോ ദിവസവും ചെയ്തുതീർക്കേണ്ട ജോലികൾ അന്നു തന്നെ ചെയ്തുതീർക്കാൻ ശ്രമിക്കുക. നാളെ ചെയ്യാം എന്ന് കരുതി മാറ്റിവയ്ക്കുന്ന ജോലികൾ വലിയ ഭാരമാണ് ഉദ്യോഗസ്ഥരിൽ ഏല്പിക്കുന്നത്. കൃത്യസമയത്ത് ജോലിക്ക് വരുന്നതുപോലെ പ്രധാനപ്പെട്ടതാണ് കൃത്യ സമയത്ത് ജോലി പൂർത്തിയാക്കി ഓഫീസ് വിടുന്നതും. എന്നാൽ ചില മാനേജുമെന്റുകളുടെ തെറ്റായ ധാരണ നിശ്ചിത സമയം കഴിഞ്ഞും ജോലി ചെയ്യുന്നവർക്ക് മാത്രമാണ് സ്ഥാപനത്തോട് ആത്മാർത്ഥതയുള്ളൂ എന്നാണ്. ഒരാൾ തന്നിൽ ഏല്പിക്കപ്പെട്ട ഉത്തരവാദിത്തങ്ങൾ കൃത്യസമയത്ത് പൂർത്തിയാക്കുന്നുണ്ടെങ്കിൽ, കൃത്യസമയത്ത്ഓഫീസിൽ നിന്ന് പുറത്തിറങ്ങുന്നുണ്ടെങ്കിൽ അതിന്റെ പേരിൽ ആ വ്യക്തിയെ അഭിനന്ദിക്കുകയാണ് വേണ്ടത്.
ഒരു സ്ഥാപനത്തിന് വേണ്ടിയും തീറെഴുതികൊടുക്കപ്പെട്ടതല്ല ഒരു വ്യക്തി ജീവിതവും. സ്ഥാപനത്തെ ഉദ്യോഗസ്ഥന് വേണ്ടതുപോലെ തന്നെ സ്ഥാപനത്തിന് ഉദ്യോഗസ്ഥനെയും വേണം. അത്തരമൊരു പരസ്പരവിശ്വാസവും ധാരണയും ആവശ്യകതയും ഉണ്ടെങ്കിൽ ജോലിയുടെ അന്തരീക്ഷം സുഗമമായി മുന്നോട്ടുപോകും. സ്വന്തം സന്തോഷങ്ങൾ വേണ്ടെന്ന് വയ്ക്കാതിരിക്കുകയാണ് ആദ്യം ചെയ്യേണ്ടത്. ജോലി ചെയ്ത് നടുവൊടിച്ച് സ്ഥാപനങ്ങളിൽ നിന്ന് ചണ്ടിപോലെ വലിച്ചെറിയപ്പെടുന്നവർ ഒരുപാടുപേരുണ്ട്. അതുകൊണ്ട് വാങ്ങുന്ന പ്രതിഫലത്തോട് കൂറുപുലർത്തി കൊണ്ടുതന്നെ സ്വന്തം സന്തോഷങ്ങൾ നഷ്ടപ്പെടുത്താതെ ജോലി ചെയ്യുക. വിനോദങ്ങളിൽ ഏർപ്പെടുക. മുഴുവൻ സമയവും ജോലി ചെയ്താൽ മുഴുവൻ കാലം ജോലി ചെയ്യാൻ കഴിയില്ലെന്ന് മറന്നുപോകരുത്. സ്വന്തം സന്തോഷം മറന്നുപോകാതെ ജോലിയിൽ സന്തോഷം കണ്ടെത്തണം.
ജോലിസമ്മർദം വീണ്ടും ചർച്ചയാകുമ്പോൾ…
Date:
