അവസരം ഒരു നറുക്കെടുപ്പാണ്. നൂറായിരം കുറികളിൽ നിന്ന് നിങ്ങളുടെ പേരെഴുതിയ തുണ്ടുകടലാസ് തിരഞ്ഞെടുക്കപ്പെടുന്നു. ഇന്നലെവരെ ആരാലും പ്രത്യേകമായി ശ്രദ്ധിക്കപ്പെടാതിരുന്ന നിങ്ങൾ അതോടെ ശ്രദ്ധിക്കപ്പെടുന്നു. ഫ്‌ളാഷ് ക്യാമറകളുടെ മുന്നിൽ ഒരു സെലിബ്രിറ്റി ആഘോഷിക്കപ്പെടുന്നതുപോലെ നിങ്ങൾ സവിശേഷശ്രദ്ധാർഹനാകുന്നു. അവസരം ലഭിച്ചത് നിങ്ങൾ അതിന് യോഗ്യനായതുകൊണ്ടു മാത്രമായിരിക്കണമെന്നില്ല. മറിച്ച് അവസരം കിട്ടുക എന്നത് നിങ്ങളുടെ വിധിയായിരുന്നു.
അവസരം കിട്ടുക എന്നതാണ് പ്രധാനം. അവസരം കിട്ടിക്കഴിയുമ്പോൾ അത് എങ്ങനെ വിനിയോഗിക്കുന്നു എന്നത് നിങ്ങളുടെ കഴിവും അതിനുവേണ്ടിയുള്ള അദ്ധ്വാനം നിങ്ങളുടെ വിജയവും നിശ്ചയിക്കുന്നു.
അവസരം പാഴാക്കാനും വിനിയോഗിക്കാനുമുളളവയാണ്.അവസരങ്ങളോടുള്ള നിങ്ങളുടെ ആഭിമുഖ്യമാണ് അവസരത്തിന്റെ വില നിശ്ചയിക്കുന്നത്. ഒരു അവസരത്തിന് വേണ്ടി നിങ്ങൾ എത്രമാത്രം സ്ട്രെയ്നെടുത്തു, എത്ര ദൂരം താണ്ടി ഇതെല്ലാം പ്രധാനപ്പെട്ടതാണ്.
അവസരങ്ങൾ ചിലരെ തേടിവരും. വേറെചിലർ അവസരങ്ങളെ തേടിച്ചെല്ലും. അതുകൊണ്ട് ഏതാണ് നല്ലത് എന്നോ ഏതാണ് മോശം എന്നോ പറയാൻ കഴിയില്ല. പക്ഷേ ഒന്നു പറയാമെന്ന് തോന്നുന്നു, അവസരം കിട്ടുക എന്നതാണ് പ്രധാനം.
അവസരം ഒരു പടിയാണ്. വിജയത്തിന്റെ ആയിരം പടികളുളള കോവണിയിലെ ആദ്യത്തെ ചുവട്. അവസരങ്ങൾക്കുവേണ്ടി ഏതറ്റം വരെ പോകാനും തയ്യാറുള്ളവരുടെ ലോകമാണ് ഇതെന്ന കാര്യം നമ്മെ അത്ഭുതപ്പെടുത്തേണ്ടതാണ്.
കഴിവു തെളിയിക്കപ്പെട്ടവരെക്കാൾ കഴിവുതെളിയിക്കപ്പെടാത്തവരാണ് ഈ ലോകത്തിലേറെയുളളത്. കാരണം അവർ അവസരം കിട്ടാത്തവരാണ്. അവസരം നിഷേധിക്കപ്പെട്ടവരുമായിരിക്കാം അവർ.
ജീവിതം ഒരു അവസരമാണ്. നാം ആരും നേടിയെടുത്തതല്ല അത്. നാമാരും പൊരുതിയെടുത്തതുമല്ല. അത് സ്വാഭാവികമായി നമ്മിലേക്ക് വന്നുചേർന്നതാണ്. ഇനി അത് പ്രയോജനപ്പെടുത്തേണ്ടത് നമുക്ക് മുമ്പിലെ വെല്ലുവിളിയാണ്.
സ്നേഹിക്കാനും സൗഹൃദപ്പെടാനും വാത്സല്യപ്പെടാനും സഹായിക്കാനും സേവിക്കാനും എത്രയെത്ര അവസരങ്ങളാണ് ഒരേയൊരു ജീവിതം കൊണ്ട് നമുക്ക് വ്യത്യസ്തമായി ലഭിച്ചിരിക്കുന്നത്.
അവസരം കിട്ടുന്നത് അഭിനയിക്കാനും ടി.വി ചാനലിലെ പ്രോഗ്രാമിനും മാത്രമല്ല, ജീവിക്കാനും കൂടിയാണ്. ആ അവസരത്തെ എങ്ങനെ പ്രയോജനപ്പെടുത്തിയെന്നതാണ് നാളെ നമ്മുടെ ജീവിതം അടയാളമാകാനുള്ള സാധ്യതയും.
അവസരം
Date:
