ജീവിതത്തിലെ വിജയങ്ങൾക്ക് തടസ്സമായി നില്ക്കുന്നതിൽ പ്രധാനപ്പെട്ടതാണ് അലസത. അലസരായിട്ടുളള വ്യക്തികൾ ജീവിതത്തിൽ ഒരിക്കലും വിജയിക്കുന്നില്ല. കാരണം പ്രവർത്തിക്കാൻ കഴിവുണ്ടായിട്ടും അധ്വാനിക്കാനുള്ള വിമുഖതയാണ് അലസത. തികച്ചും അപകീർത്തിപരമായ ഒന്നായിട്ടാണ് അലസതയെ കണക്കാക്കുന്നത്. ഒരു കാര്യത്തിലും അവർ താല്പര്യം കാണിക്കുന്നില്ല. ഒന്നും അവരെ പ്രചോദിപ്പിക്കുന്നില്ല.
മോട്ടിവേഷന്റെ അഭാവം, താല്പര്യമില്ലായ്മ, ആത്മവിശ്വാസമില്ലായ്മ എന്നിവയെല്ലാമാണ് അലസതയിലേക്ക് ഒരു വ്യക്തിയെ നയിക്കുന്നത്. ദീർഘസമയം മൊബൈലിലും ഇന്റർനെറ്റിലുമൊക്കെ ചെലവഴിക്കുന്നത്, ആവശ്യത്തിലും കൂടുതൽ നേരം കിടന്നുറങ്ങുന്നത്, ജീവിതത്തിൽ ഒന്നിനെക്കുറിച്ചും പ്രതീക്ഷകളില്ലാത്തത് ഇതെല്ലാം അലസതയുടെ ചില പ്രതിഫലനങ്ങളാണ്. നേരം വെളുത്തു കഴിഞ്ഞിട്ടും മൂടിപ്പുതച്ചുകിടന്നുറങ്ങുന്നവരില്ലേ,, ഏല്പിക്കപ്പെട്ട ഉത്തരവാദിത്വം പോലും നേരാംവണ്ണം ചെയ്തുതീർക്കാത്തവരില്ലേ.. അവരൊക്കെ അലസതയുടെ ഗർത്തങ്ങളിൽ വീണുപോയവരാണ്. അവർ സ്വയം ശ്രമിച്ചാൽ മാത്രമേ അതിൽ നിന്നു പുറത്തുകടക്കാനാവൂ. എന്നാൽ പെട്ടെന്നൊരു ദിവസം കൊണ്ട് അലസതയെ പടിക്കു പുറത്താക്കാൻ കഴിയുമെന്ന് വിചാരിക്കരുത്. ചെറിയ ചെറിയ ശ്രമങ്ങൾ നടത്തി വിജയിച്ചുകൊണ്ടായിരിക്കണം അലസതയെ കീഴടക്കേണ്ടിയത്.
ഉദാഹരണത്തിന് രാവിലെ എണീല്ക്കാൻ കഴിയാത്തവിധം മടിയാണ് പിടികൂടിയിരിക്കുന്നതെങ്കിൽ ആ മടി കുറച്ചുകൊണ്ടുവരാൻ എണീല്ക്കുന്ന സമയം തുടക്കത്തിൽ പത്തുമിനിറ്റ് നേരത്തെയാക്കുക. ഏഴുമണിക്കാണ് എണീറ്റുവരുന്നതെങ്കിൽ അലാറാം വച്ച് മനസ്സിനെ ദൃഢപ്പെടുത്തി 6.50 എന്ന് നിശ്ചിതപ്പെടുത്തുക. അടുത്ത ദിവസം ആ സമയം 6.30 ആക്കുക. ഇങ്ങനെ ഓരോ ദിവസത്തെയും സമയത്തിന്റെ കാര്യത്തിൽ മാറ്റംവരുത്തി ഒരു നിശ്ചിതസമയം പതിവായി ഉറങ്ങിയെണീല്ക്കുന്നതിനായി നിശ്ചയിക്കുക. ഉറക്കം ശരീരത്തിന് ആവശ്യമാണെങ്കിലും കൂടുതൽഉറക്കം പലപ്പോഴും ജീവിതത്തിൽ ക്രിയാത്മകമായി പ്രവർത്തിക്കുന്നതിൽ നിന്ന് പിന്തിരിപ്പിക്കുന്നു. പലരുടെയും സമയം പാഴാക്കിക്കളയുന്നത് ഉറക്കവുംമൊബൈലും അനാവശ്യസംസാരവുമൊക്കെയാണ്. ഇത്തരം കാര്യങ്ങളിൽ പതുക്കെപതുക്കെ മാറ്റമുണ്ടാക്കുക. അതോടൊപ്പം കാഴ്ചപ്പാടുകളിലും പ്രവർത്തനങ്ങളിലും മാറ്റം വരുത്തുക.
- കൈപ്പിടിയിൽ ഒതുങ്ങുന്നവിധത്തിലുള്ള ലക്ഷ്യങ്ങളുണ്ടായിരിക്കുക. അവയാഥാർത്ഥ്യബോധമുള്ളവയായിരിക്കണം.
- സ്വയം പരിപൂർണ്ണനാണെന്ന ചിന്തപാടില്ല
- അവനവനെക്കുറിച്ച് വില കുറച്ചുകാണാതെ സ്വയം പോസിറ്റീവായി സംസാരിക്കുക
- പ്രവർത്തിക്കാനുള്ള കാര്യങ്ങളുടെ ഒരു ലിസ്റ്റ് തയ്യാറാക്കുക
- സ്വന്തം കഴിവുകൾപ്രയോഗിക്കുക
- ലക്ഷ്യത്തിൽ നിന്ന് വ്യതിചലിക്കാതെയിരിക്കുക
- ആവശ്യമെങ്കിൽ മറ്റുള്ളവരുടെ സഹായം തേടുക
- പ്രവർത്തിച്ചതിനെക്കാൾ കൂടുതലായിരിക്കും നാം പ്രവർത്തിക്കാതെ പോയ ദിവസങ്ങളുടെ എണ്ണം. അദ്ധ്വാനിച്ച ദിവസങ്ങളെക്കാൾ അലസതയോടെ കഴിച്ചുകൂട്ടിയ ദിവസങ്ങളായിരിക്കും കൂടുതൽ.
വെറുതെയൊന്ന് പുറകോട്ട് തിരിഞ്ഞുനോക്കുക. നമുക്ക് എന്തുമാത്രം ഫലപ്രദമായി വിനിയോഗിക്കാൻ കഴിയുമായിരുന്ന ദിവസങ്ങളായിരുന്നു കടന്നുപോയത്. സ്വന്തം കഴിവുകൾ പ്രകടിപ്പിക്കാൻ കിട്ടിയിരുന്ന അവസരങ്ങൾ.. ക്രിയാത്മകമായി ചെലവഴിക്കാൻ കിട്ടിയ അവസരങ്ങൾ.. അവനവർക്കു മാത്രമല്ല മറ്റുള്ളവർക്കുകൂടി പ്രയോജനപ്പെടുത്താൻ കഴിയുമായിരുന്ന നല്ല സന്ദർഭങ്ങൾ..അവയെല്ലാം ഇന്ന് നമുക്ക് നഷ്ടമായിരിക്കുന്നു.
സാരമില്ല തിരിച്ചുപിടിക്കാൻ കഴിയാത്തത് കഴിഞ്ഞുപോയ സമയം മാത്രമാണല്ലോ. പക്ഷേ ഇനിയെങ്കിലും നാം ഒരു തീരുമാനത്തിലെത്തണം. അലസമായി ചെലവഴിക്കാനുള്ളതല്ല ജീവിതം,പാഴാക്കിക്കളയാനുള്ളതല്ല സമയം. കൂടുതൽ ചെയ്യാൻ, പ്രവർത്തിക്കാൻ നാളെയെന്നൊരു സമയം നമുക്ക് ഉണ്ടാവണമെന്നില്ല. അതുകൊണ്ട് ഈ ദിവസം, ഈ നിമിഷം അലസതയിൽ നിന്നുണരുക. മടിയൻ മല ചുമക്കുമെന്നാണല്ലോ.. ഓരോ ദിവസവും ചെയ്തുതീർക്കേണ്ട കാര്യങ്ങൾ അന്നുതന്നെ ചെയ്തുതീർക്കുക.
