സ്‌ട്രെസ് അനുഭവിക്കാത്ത മനുഷ്യരുണ്ടാവില്ല. പല രീതിയിൽ പല ഘട്ടങ്ങളിലായി പലതരം സ്ട്രസുകളിലൂടെയാണ് മനുഷ്യർ കടന്നുപൊയ്ക്കൊണ്ടിരിക്കുന്നത്. എന്നാൽ പലപ്പോഴും അവയെല്ലാം സ്‌ട്രെസാണെന്ന് ആരും മനസ്സിലാക്കാറില്ല. സ്‌ട്രെസ് അനുഭവിക്കുന്ന വ്യക്തികളിൽ പൊതുവെ പ്രകടമായി കാണുന്ന ചില ലക്ഷണങ്ങളുണ്ട്. ഈ ലക്ഷണങ്ങൾ നിങ്ങളിൽ തുടർച്ചയായി കാണപ്പെടുന്നുണ്ടോയെന്ന് വിലയിരുത്തുക.
തലവേദന
എല്ലാ ദിവസവും തലവേദന ഉണ്ടാകുന്നുണ്ടോ? അമിതമായ സ്‌ട്രെസ് അനുഭവിക്കുന്നതിന്റെ സൂചനയാണ് ഇത്.
ദേഷ്യം
മനുഷ്യർക്ക് ദേഷ്യം സ്വഭാവികമാണ്. എന്നാൽ നിയന്ത്രണവിധേയമല്ലാത്തവിധത്തിൽ, എപ്പോഴും എന്തിനും ദേഷ്യപ്പെടുന്ന ശീലമാണെങ്കിൽ ആ ദേഷ്യങ്ങൾക്ക് പിന്നിൽ സ്‌ട്രെസുണ്ടെന്നാണ് പറയപ്പെടുന്നത്.
വിട്ടുമാറാത്ത അസുഖം
ചിലരുണ്ട് അവർക്ക് എപ്പോഴും ഓരോരോ അ സുഖങ്ങളാണ്. ഈ അസുഖങ്ങൾക്കെല്ലാം കാരണം അവരുടെ സ്‌ട്രെസാണ്.
മുഖക്കുരു
എണ്ണമയം കൂടുതലുള്ള ത്വക്കും ഹോർമോൺ വ്യതിയാനങ്ങളും മുഖക്കുരുവിന് കാരണമാകാറുണ്ട്. പക്ഷേ സ്‌ട്രെസും ഒരു കാരണമാണെന്ന് മറക്കരുത്.
വിശപ്പ്, ദഹനം, സെക്സ് എന്നിവയിലുള്ള മാറ്റം
അമിതമായ സംഘർഷങ്ങളിലൂടെ കടന്നുപോകുന്ന വ്യക്തികൾ നേരിടുന്ന മൂന്നു പ്രധാനപ്പെട്ട പ്രശ്നങ്ങളാണ് ഇവ. ലൈംഗികകാര്യങ്ങളിലും ഭക്ഷണകാര്യങ്ങളിലും ഇവർക്ക് താല്പര്യക്കുറവോ അല്ലെങ്കിൽ അവയുടെ താല്പര്യങ്ങളിൽ മാറിമാറി വ്യത്യാസമോ ഉണ്ടായിക്കൊണ്ടിരിക്കും. സമ്മർദ്ദങ്ങൾ നേരിടുന്നവരുടെ ദഹനവ്യവസ്ഥ കൃത്യമായ രീതിയിൽ പ്രവർത്തിക്കുകയുമില്ല. നെഞ്ചെരിച്ചിൽ, പുളിച്ചുതികട്ടൽ എന്നൊക്കെ നാം പൊതുവെ പറയുന്ന പല രോഗലക്ഷണങ്ങളും സ്‌ട്രെസുമായി ബന്ധപ്പെട്ടവയാണ്. അമിതമായ സംഘർഷങ്ങളുമായി സ്വാഭാവികമായ ജീവിതം മുന്നോട്ടുകൊണ്ടുപോവാനാവുകയില്ല. അതുകൊണ്ട് സ്‌ട്രെസുമൂലം അത്യധികം വിഷമിക്കുന്നുണ്ടെങ്കിൽ അവയെ ഫലപ്രദമായി കൈകാര്യം ചെയ്യാനുള്ള വഴികൾ അന്വേഷിക്കാൻ മറക്കരുത്.
