നമ്മുടെ കുട്ടികളിൽ പലരും കംപ്യൂട്ടർ ഉപയോഗിക്കുന്നവരും ഗൂഗിൾ സെർച്ച് ചെയ്യുന്നവരുമാണ്. മക്കൾക്ക് ചെറുപ്രായത്തിലേ സ്വന്തമായി കംപ്യൂട്ടറും സ്മാർട്ട് ഫോണും വാങ്ങിച്ചുകൊടുക്കുന്നവരും അവരതിൽ എക്സ്പേർട്ട് ആണെന്ന് അഭിമാനത്തോടെ പറയുന്നവരും കുറവല്ല. പക്ഷേ ഈ കുട്ടികൾ എന്തൊക്കെയാണ് ഗൂഗിളിൽ പരതിക്കൊണ്ടിരിക്കുന്നത് എന്ന് അറിയാമോ? കാസ്പെർസ്‌കൈ ലാബിന്റെ അടുത്തകാലത്ത്നടന്ന ഗവേഷണം വെളിവാക്കിയത് നടുക്കമുളവാക്കുന്ന ചില കാര്യങ്ങളായിരുന്നു. കഴിഞ്ഞ അവധിക്കാലത്ത് നമ്മുടെ കുട്ടികൾ ഓൺലൈനിൽ എന്താണ് അന്വേഷിച്ചത് എന്നാണ് ഈ സർവ്വേ വ്യക്തമാക്കിയത്.
ഇന്ത്യയിലെ കുട്ടികളിൽ 0.19 ശതമാനവും അന്വേഷിച്ചത് ആൽക്കഹോൾ, പുകയിലെ, നാർക്കോട്ടിക്സ് തുടങ്ങിയ വിഭാഗങ്ങളായിരുന്നു. 2.81 ശതമാനത്തിന്റെ താല്പര്യം മുതിർന്നവരുടെ ലോകത്തെ വിഷയങ്ങൾ അറിയാനായിരുന്നു. പ്രത്യേകിച്ച് ലൈംഗികമായ കാര്യങ്ങൾ. 3.06 ശതമാനം കംപ്യൂട്ടർ ഗെയിമുകളുടെ പുറകെപോയി. 6.26 ശതമാനം അല്പം വേറിട്ടുനിന്നു. അവരുടെ ഇഷ്ടങ്ങൾ വാർത്തയും മറ്റ് കാര്യങ്ങളും അറിയാനായിരുന്നു. 13.80 ശതമാനം ഇലക്ട്രോണിക് കോൺഫ്രൻസിന് സമയം കൊടുത്തു. 40.68 ശതമാനം കമ്മ്യൂണിക്കേഷൻ മീഡിയ ഓൺലൈനിന്റെ ഒപ്പം കൂടി. 2.92 ശതമാനം മറ്റ് ചില താല്പര്യങ്ങളുടെ പുറകെ പോയി.
ശ്രദ്ധേയമായ മറ്റൊരു മാറ്റം സോഷ്യൽ മീഡിയയിൽ ചെലവഴിക്കുന്നതിനെക്കാൾ കൂടുതൽ വീഡിയോ കാണാനും പാട്ട് കേൾക്കാനും കുട്ടികൾ തയ്യാറായി എന്നതാണ്. തീരെ ചെറിയകുട്ടികൾ കാർട്ടൂൺ നെറ്റ്‌വർക്കിനോടാണ് ഇഷ്ടം കൂടിയത്. ഫിഫാ വേൾഡ് കപ്പിന്റെ സ്‌കോർ നില അറിയാൻ തിരക്കുകൾക്കിടയിലും കുട്ടികൾ സമയം കണ്ടെത്തുകയും ചെയ്തു. ആമസോൺ പോലെയുള്ള ഓൺലൈൻ സ്റ്റോറുകൾ സ്ഥിരമായി സന്ദർശിക്കുന്ന കുട്ടികളും ഉണ്ട്. ഐ ഫോണിൽ താല്പര്യമുള്ളവരും വസ്ത്രങ്ങളിൽ താല്പര്യമുള്ളവരും അതാത് ഓൺലൈൻ സ്റ്റോറുകളാണ് സേർച്ച് ചെയ്യുന്നത്. പ്രായപൂർത്തിയായവർക്കുള്ള സൈറ്റുകൾ മാതാപിതാക്കൾ ബ്ലോക്ക് ചെയ്തുവെങ്കിലും അത് സന്ദർശിക്കാൻ ശ്രമിച്ച് പരാജയപ്പെട്ട കുട്ടികളും സർവ്വേയിലുണ്ടായിരുന്നു. കുട്ടികൾ അപ്ഡേറ്റഡ് ആകുന്നത് നല്ലതുതന്നെ. പക്ഷേ അവരുടെ മേൽ മാതാപിതാക്കളുടെ ഒരു കണ്ണ് ഉണ്ടായിരിക്കണമെന്ന് മാത്രം.
