പ്രമേഹരോഗത്തിന്റെ ലക്ഷണങ്ങള്‍ നേരത്തെ തിരിച്ചറിഞ്ഞാല്‍ രോഗം സങ്കീര്‍ണ്ണമാകാതെ ചികിത്സ നേടാന്‍ സാധിക്കും. എന്നാല്‍ പലപ്പോഴും കണ്ടുവരുന്നത് നമ്മുടെ അശ്രദ്ധയോ അജ്ഞതയോ ഈ രോഗം മൂര്‍ച്ഛിക്കാന്‍ കാരണമാകുന്നു എന്നാണ്. പ്രമേഹരോഗം സ്ഥിരീകരിക്കപ്പെടുന്നതിന് മുമ്പ് തന്നെ പല ലക്ഷണങ്ങളും പ്രകടമാണ്. അവ തിരിച്ചറിഞ്ഞ് വേണ്ട സമയത്ത് ചികിത്സ നടത്തിയാല്‍ പ്രശ്‌നം ഗുരുതരമാകുകയില്ല.
ക്ഷീണം ,തളര്‍ച്ച
ശരീരാരോഗ്യത്തിനും എനര്‍ജിക്കും വേണ്ടി ഭക്ഷണം കഴിച്ചു കഴിഞ്ഞാലും അത്യധികമായ ക്ഷീണമോ തളര്‍ച്ചയോ ഉണ്ടാകുന്നത് പ്രമേഹത്തിന്റെ സാധ്യതയാകാന്‍ സാധ്യതയുണ്ട്.
ദാഹം
ദാഹമാണ് മറ്റൊരു ലക്ഷണം. ഇടയ്ക്കിടെ വെള്ളം കുടിക്കാന്‍ തോന്നുക, മൂത്രമൊഴിക്കുക. പ്രമേഹരോഗത്തിന്റെ മുഖ്യ രണ്ടു ലക്ഷണങ്ങളില്‍ പ്രധാനപ്പെട്ടവയാണ് ഇവ രണ്ടും.
അമിതമായ വിശപ്പ്
ഭക്ഷണം കഴിച്ചുകഴിഞ്ഞാലുടന്‍ തന്നെ വിശക്കുക. ടൈപ്പ് വണ്‍ രോഗികളിലാണ് ഈ ലക്ഷണം കൂടുതലായി കണ്ടുവരുന്നത്.
തൂക്കം കുറയുക
ഇതും ടൈപ്പ് വണ്‍ പ്രമേഹരോഗികളില്‍ കണ്ടുവരുന്ന രോഗലകഷണമാണ്. തുടര്‍ച്ചയായ മൂത്രമൊഴിക്കലിലൂടെ കലോറി നഷ്ടപ്പെടുന്നു. കൂടാതെ ഗ്ലൂക്കോസും. ഇത് തൂക്കം കുറയ്ക്കലിന് കാരണമാകുന്നു.
കാഴ്ച മങ്ങല്‍
കാഴ്ചകള്‍ അവ്യക്തമായി കണ്ടുതുടങ്ങുന്നത് പ്രമേഹരോഗത്തിന്റെ ലക്ഷണങ്ങളില്‍ പെടുന്നു.
മുറിവുണങ്ങാന്‍ താമസമെടുക്കുന്നു
നിയന്ത്രണവിധേയമാകാത്ത പ്രമേഹത്തിന്റെ പ്രധാന ലക്ഷണമാണ് മുറിവ് ഉണങ്ങാന്‍ സമയമെടുക്കുന്നത്.
കാല്‍പ്പാദങ്ങളിലെ മരവിപ്പ്
കാല്‍പ്പാദങ്ങളില്‍ വേദന അനുഭവിക്കാന്‍ കഴിയാത്തതാണ് മറ്റൊരു ലക്ഷണം.
തലവേദന, കഴുത്തിന്റെ ചുറ്റിനും കാണപ്പെടുന്ന കറുത്ത വരകള്‍ തുടങ്ങിയവയും പ്രമേഹരോഗത്തിന്റെ ലക്ഷണങ്ങളില്‍ പെടുന്നു.
