ദിവസം ഇരുപത്തിനാല് മണിക്കൂര്‍ പോരെന്നു തോന്നുന്നത്ര ജോലികള്‍. തിരക്കിനിടയിലും ചുറുചുറുക്കോടെ ഓടി നടക്കാന്‍ കൂടുതല്‍ ഊര്‍ജ്ജം കൂടിയേ തീരൂ. പ്രസരിപ്പ് നിലനിര്‍ത്താന്‍ ഇതാ ചില വഴികള്‍:-
- സമീകൃതാഹാരത്തിലൂടെ മാത്രമേ ശരീരത്തിന് മതിയായ ഊര്‍ജ്ജം ലഭിക്കൂ. തവിടോട് കൂടിയ ധാന്യങ്ങള്‍, മത്സ്യം എന്നിവ കൂടുതലായി ഭക്ഷണത്തില്‍ ഉള്‍പ്പെടുത്തുക. പാല്‍, പാലുല്‍പ്പന്നങ്ങള്‍, സോയാബീന്‍ തുടങ്ങിയവ കൂടുതല്‍ കഴിക്കുന്നത് ഉത്തമം.
- സ്ത്രീകള്‍ക്ക് ദിവസേന കുറഞ്ഞത് 300 മില്ലിഗ്രാമും, പുരുഷന്മാര്‍ക്ക് 350 മില്ലിഗ്രാമും മഗ്നീഷ്യം ആവശ്യമാണ്‌. ദിവസവും ഒരുപിടി ബദാം, അണ്ടിപ്പരിപ്പ് എന്നിവ കഴിക്കുന്നത് മഗ്നീഷ്യം ലഭിക്കുന്നതിനും, അതുവഴി ഊര്‍ജ്ജം കിട്ടുന്നതിനും സഹായിക്കും.
- ദിവസേന കുറഞ്ഞത് പത്ത് മിനിറ്റ് നേരമെങ്കിലും നടക്കാന്‍ സമയം കണ്ടെത്തുക. ഈ നടത്തം തരുന്ന ഊര്‍ജ്ജം കുറഞ്ഞത് രണ്ടു മണിക്കൂര്‍ നീണ്ടു നില്‍ക്കും. ഓഫീസിലേയ്ക്കും, ഷോപ്പിംഗിനുമുള്ള യാത്രകള്‍ ചെറിയ ദൂരത്തേയ്ക്ക് ആണെങ്കില്‍ നടക്കുക. കഴിവതും ലിഫ്റ്റ്‌ ഒഴിവാക്കി പടികള്‍ കയറുക.
- ഭക്ഷണം ഒഴിവാക്കുന്ന ശീലം ഊര്‍ജ്ജനഷ്ടമുണ്ടാക്കും. ജോലിത്തിരക്കിന്നിടയില്‍ പ്രാതല്‍ ഒഴിവാക്കുന്നവരില്‍ താരതമ്യേന ഊര്‍ജ്ജസ്വലത കുറയും. ദിവസം മുഴുവന്‍ നീണ്ടുനില്‍ക്കുന്ന ഊര്‍ജ്ജമാണ് പ്രാതല്‍ നല്‍കുന്നത്.
- ചെറിയ തോതിലുള്ള നിര്‍ജ്ജലീകരണം പോലും തളര്‍ച്ചയും മന്ദിപ്പും ഉണ്ടാക്കും. ദിവസവും എട്ടു ഗ്ലാസ് വെള്ളം കുടിക്കണം. ചൂടുകാലമാണെങ്കില്‍ ഇടനേരങ്ങളില്‍ കരിക്കിന്‍വെള്ളം, നാരങ്ങാവെള്ളം എന്നിവ കുടിക്കുക.
- മധുരത്തിന്റെ ഉപയോഗം രക്തത്തിലെ പഞ്ചസാരയുടെ അളവ് കൂട്ടുകയും, ക്ഷീണമുണ്ടാക്കുകയും ചെയ്യും. മധുരപലഹാരങ്ങള്‍ ഒഴിവാക്കുക. പഞ്ചസാരയ്ക്ക് പകരം ശര്‍ക്കര ഉപയോഗിക്കുക. തവിടോട് കൂടിയ ധാന്യങ്ങള്‍ കഴിക്കുന്നത് കഴിക്കുന്നത് ഇന്‍സുലിന്‍ ആഗിരണം ചെയ്യാന്‍ സഹായിക്കും.
- ഇടവേളകളില്‍ കഴിക്കുന്ന ലഘുഭക്ഷണവും ഊര്‍ജ്ജം നിറഞ്ഞതാകാന്‍ ശ്രദ്ധിക്കുക. പ്രോട്ടീന്‍, നാരുകള്‍, കൊഴുപ്പ് എന്നിവ അടങ്ങിയ ലഘുഭക്ഷണം കഴിക്കുന്നതാണ് നല്ലത്.
- അമിതമായ ഉത്കണ്ഠ മൂലമുള്ള മാനസികസമ്മര്‍ദ്ദം ഊര്‍ജ്ജനഷ്ടത്തിനിടയാക്കും. അമിതമായ ദേഷ്യവും ഇതേ അവസ്ഥ സൃഷ്ടിക്കും. യോഗ പരിശീലിക്കുന്നത് സമ്മര്‍ദ്ദത്തെ അകറ്റി പ്രസരിപ്പ് ലഭിക്കാന്‍ സഹായിക്കും.
- വിളര്‍ച്ച, തൈറോയ്ഡ് എന്നിവയും ക്ഷീണത്തിന് കാരണമാകും. ഭക്ഷണശൈലിയിലും വ്യായാമത്തിലും ശ്രദ്ധിച്ചിട്ടും ക്ഷീണമനുഭവപ്പെടുന്നുണ്ടെങ്കില്‍ ഡോക്ടറെ കണ്ടു പരിശോധിക്കുക.
