എട്ടുവയസുമുതൽ ഒരു കുട്ടിയെ ധ്യാനം പരിശീലിപ്പിക്കാമോ എങ്കിൽ ഒരു തലമുറയിൽ നിന്ന് തന്നെ നമുക്ക് അക്രമത്തെ തുടച്ചുനീക്കാനാവും.
– ദലൈലാമ
നിസ്സാരമായ ഒരു പ്രവൃത്തിയൊന്നുമല്ല ധ്യാനം. തിരക്കുപിടിച്ച ഈ ലോകത്തിൽ ഒരാൾ ഇത്തിരിയെങ്കിലും സമയം തന്നെ കണ്ടെത്താനും തിരുത്താനുമായി നീക്കിവയ്ക്കുന്നുണ്ടെങ്കിൽ അത് വലിയൊരു കാര്യമാണ്. കാരണം അയാൾക്ക് തന്നോടും ഈ സമൂഹത്തോടും പ്രതിബദ്ധതയും കടപ്പാടുമുണ്ട്. ഒരാൾ ധ്യാനിക്കുമ്പോൾ അയാൾ സ്വയം എന്തൊക്കെയോ കണ്ടെത്തുന്നുണ്ട്. തന്നെതന്നെ നിയന്ത്രിക്കുവാനുള്ള കഴിവും അയാൾ അതിലൂടെ നേടിയെടുക്കുന്നു. സന്തോഷകരമായ ജീവിതത്തിനുള്ള ഒരു എളുപ്പവഴിയായിട്ടാണ് ഇന്ന് പലരും ധ്യാനത്തെ കാണുന്നത്.
ശാരീരികവും മാനസികവുമായ നിരവധി നന്മകൾ ധ്യാനത്തിലൂടെ ലഭിക്കുന്നുണ്ട്. മനസ്സിലെ നിഷേധാത്മകമായ ചിന്തകളെ ദൂരെയകറ്റാനും ആകുലതകൾ, ഉത്കണ്ഠകൾ എന്നിവയെ പ്രതിരോധിക്കാനും ധ്യാനം വഴി കഴിയുന്നു. ഉറക്കക്കുറവു മൂലമുള്ള പ്രശ്നങ്ങളുടെ പരിഹാരം, പ്രായം കൂടുന്നത് കുറയ്ക്കൽ, പ്രതിരോധ ശേഷി വർദ്ധിപ്പിക്കൽ, രക്തസമ്മർദ്ദം കുറയ്ക്കൽ എന്നിങ്ങനെ നിരവധി ശാരീരിക നന്മകൾ ധ്യാനം വഴി ആർജ്ജിച്ചെടുക്കാൻ കഴിയും. മാനസികമായി ലഭിക്കുന്ന ഗുണഗണങ്ങൾ ഇവയാണ്. ശാന്തത, ഊർജ്ജം, ചിന്തകൾക്കുള്ള വ്യക്തത, വ്യക്തിപരമായ വളർച്ച, ആത്മവിശ്വാസം. ഓർമ്മശക്തി വർദ്ധിപ്പിക്കാനും ഏകാഗ്രത വർദ്ധിപ്പിക്കാനും ധ്യാനം ഉപകരിക്കും.
എല്ലാ ദിവസവും ഒരേ സമയം തന്നെ ധ്യാനത്തിനായി നീക്കിവയ്ക്കുന്നതായിരിക്കും നല്ലത്. ധ്യാനിക്കുന്നതിന് മുമ്പ് കാപ്പി കുടിക്കുകയോ ഭക്ഷണം കഴിച്ചുകഴിഞ്ഞതിന് ശേഷം ധ്യാനിക്കുകയോ ചെയ്യരുത്. മിതമായ വെളിച്ചം കടന്നുചെല്ലുന്ന, സുഖകരമായ വസ്ത്രം ധരിച്ചാണ് ധ്യാനത്തിനൊരുങ്ങേണ്ടത്. ധ്യാനത്തെ തടസ്സപ്പെടുത്തുന്ന യാതൊന്നും ആ മുറിയിലുണ്ടാവാതിരിക്കാനും ശ്രദ്ധിക്കണം. അതുകൊണ്ട് വാതിലുകൾ അടച്ച്, ഫോണുകൾ നിശ്ചലമാക്കി പുറമേയ്ക്കുള്ള യാതൊന്നും ശല്യപ്പെടുത്താത്ത വിധത്തിൽ സാഹചര്യങ്ങൾ ക്രമീകരിച്ച് ആന്തരികതയെ ഉണർത്താനും സ്വസ്ഥമാകാനും കഴിയുന്ന വിധത്തിൽ ധ്യാനം ആരംഭിക്കുക. ഒരു കാര്യം ഉറപ്പ് ദിവസവും 20 മിനിറ്റ് ധ്യാനത്തിന് വേണ്ടി നീക്കിവയ്ക്കാൻ കഴിയുമെങ്കിൽ നമ്മുടെ ജീവിതം ഒരിക്കലും പഴയതുപോലെയായിരിക്കുകയില്ല. അതുകൊണ്ട് ഇന്നുമുതൽ ധ്യാനത്തിന് തുടക്കമിടൂ. അത് നമ്മെ കുറെക്കൂടി നല്ല മനുഷ്യരായി മാറ്റുക തന്നെ ചെയ്യും.
