കൊച്ചുകുട്ടികളെ ഭക്ഷണം കഴിപ്പിക്കുന്നതില്‍ പെടാപാടു പെടുന്നവരാണ് മിക്ക അമ്മമാരും. മക്കളുടെ ആരോഗ്യകാര്യത്തിലും ഭക്ഷണകാര്യത്തിലും അമിതമായ ഉത്കണ്ഠയുള്ള ഈ അമ്മമാരുടെ വിചാരം എങ്ങനെയെങ്കിലും മക്കള്‍ ഭക്ഷണം കഴിക്കണം, അവരെ പരസ്യങ്ങളിലേതുപോലെ തടിച്ചസുന്ദരക്കുട്ടപ്പന്മാരാക്കിയെടുക്കണം എന്നെല്ലാമായിരിക്കും. അതിന് വേണ്ടി പല വിട്ടുവീഴ്ചകള്‍ക്കും അവര്‍ തയ്യാറായെന്നുമിരിക്കും. എന്തെല്ലാമാണ് ഈ വിട്ടുവീഴ്ചകള്‍ എന്നല്ലേ ടിവി കാണിച്ചും കമ്പ്യൂട്ടര്‍ ഓണ്‍ ചെയ്തുകൊടുത്തും മൊബൈല്‍ കളിപ്പാട്ടമായി നല്കിയുമെല്ലാമാണ് ഇത്തരം അമ്മമാര്‍ മക്കളെക്കൊണ്ട് ഭക്ഷണം കഴിപ്പിക്കുന്നത്. എന്നാല്‍ ഇത് കുട്ടികള്‍ക്ക് എന്തുമാത്രം ദോഷം ചെയ്യുന്നുണ്ട എന്ന കാര്യം ഈ പാവം അമ്മമാര്‍ അറിയുന്നില്ല. ടിവി കണ്ടും കമ്പ്യൂട്ടര്‍കാണിച്ചും ഭക്ഷണം കഴിപ്പിക്കുമ്പോള്‍ സംഭവിക്കുന്നത് ഇതാണ് . കുട്ടികള്‍ക്ക് ആഹാരത്തിന്റെ മണമോ രുചിയോ മനസ്സിലാക്കാന്‍ കഴിയാതെ പോകുന്നു. ദൃശ്യങ്ങളിലാണ് അവരുടെ മുഴുവന്‍ ശ്രദ്ധയും. പല അമ്മമാരും ടിവി കണ്ടുകൊണ്ട് ഭക്ഷണം കഴിക്കുന്നവരുമാണ്. ഈ ശീലം മക്കളെയും സ്വാധീനിക്കും. ടിവി കണ്ടുകൊണ്ട് ഭക്ഷണം കഴിക്കുമ്പോള്‍ അമിതമായി ഭക്ഷണം കഴിച്ചുപോകും എന്നതാണ് മറ്റൊരു ദൂഷ്യം. ഇത് കുട്ടികളെ പൊണ്ണത്തടിയന്മാരുമാക്കിതീര്‍ക്കും.
അന്നം ദൈവമാണ്. അതിനെ നാം ബഹുമാനിക്കണം. എത്രയോ പേരുടെ വിയര്‍പ്പും സ്‌നേഹവുമെല്ലാമാണ് ഇപ്പോള്‍ നാം കഴിക്കുന്ന ഭക്ഷണം. അതുകൊണ്ട് അവരുടെ ഓരോരുത്തരുടെയും അദ്ധ്വാനത്തെ മാനിച്ചും നാം ചെലവഴിച്ച പണത്തിനോട് നീതി പുലര്‍ത്തിയും വേണം ഭക്ഷണം കഴിക്കേണ്ടത്. വാശിക്കും പിടിവാശിക്കും ദേഷ്യത്തിനും ഭക്ഷണം വലിച്ചെറിയുന്നവരും പാതിവഴിയില്‍ നിര്‍ത്തിയെണീറ്റുപോകുന്നവരും ഒരുകാര്യം കൂടി മനസ്സിലാക്കണം. ഒരുനേരം പോലും ഭക്ഷണം കഴിക്കാന്‍ വകയില്ലാത്തവര്‍ ഈ ഭൂമുഖത്തുണ്ട്. അവരുടെയിടയിലാണ് മൂന്നും നാലുംനേരവും നാം ഭക്ഷണം കഴിക്കുന്നത്. വച്ചുവിളമ്പുന്നതിന്റെ കണക്കുപറഞ്ഞും ശപിച്ചും ഒരു സ്ത്രീയും അടുക്കളയില്‍ പാകം ചെയ്യാതിരിക്കട്ടെ. അത്തരം ചില അപശബ്ദങ്ങള്‍ കേട്ടുവളരുന്ന കുട്ടികള്‍ക്കു ഭക്ഷണത്തോട് ആദരവുണ്ടാകാനും വഴിയില്ല. അതുകൊണ്ട് ആരോഗ്യകരമായ ഭക്ഷണശീലങ്ങള്‍ വീടുകളില്‍ നിന്ന് തന്നെ തുടങ്ങട്ടെ. മാതാപിതാക്കള്‍ അക്കാര്യത്തില്‍ മാതൃകകളാകട്ടെ കുട്ടികള്‍ അതു കണ്ടുപഠിക്കട്ടെ.
