പ്രതിരോധ ശേഷിയിലുള്ള കുറവാണ് നമ്മെ പല തരം രോഗങ്ങൾ പിടികൂടൂന്നതിനുള്ളപ്രധാന കാരണം. ലോകത്തെ മുഴുവൻ ഭയപ്പെടുത്തുന്ന കൊറോണ വൈറസ് ഉൾപ്പടെയുള്ള രോഗങ്ങളെയും ഒരു പരിധിവരെ പ്രതിരോധ ശേഷിയിലൂടെ നേരിടാം. വെറുതെ കുറെ ഭക്ഷണം കഴിച്ചുവെന്ന് കരുതി നമുക്ക് ആരോഗ്യമുണ്ടാവണമെന്നില്ല. കഴിക്കുന്ന ഭക്ഷണം പോഷകസമൃദ്ധമായിരിക്കണം. നല്ല ഭക്ഷണം നല്ല ആരോഗ്യം നല്കുന്നു. എങ്കിലും ചില പ്രത്യേക ഭക്ഷണം ശരീരത്തിലെ രോഗപ്രതിരോധ ശേഷി കൂട്ടുന്നവയാണ്. വൈറ്റമിൻ സി അടങ്ങിയിട്ടുള്ള ഭക്ഷണക്രമം ഇതിന് ശീലിക്കണം. ഹെർബൽ റെമിഡീസും പ്രതിവിധിയാണ്.
മതിയായ ഉറക്കം പ്രതിരോധ ശേഷി വർദ്ധിപ്പിക്കുന്നതായി ജർമ്മൻ ശാസ്ത്രജ്ഞർ കണ്ടെത്തിയിട്ടുണ്ട്. ഇമ്മ്യൂൺ സിസ്റ്റത്തിലെ ടി സെൽസ് ഉല്പാദിപ്പിക്കാൻ നല്ല ഉറക്കത്തിലൂടെ സാധിക്കുന്നു. ശരീരം ഉറങ്ങുമ്പോൾ ഊർജ്ജ്വസ്വലമായ സെല്ലുകൾ ഉല്പാദിപ്പിക്കപ്പെടുന്നു. ഏഴു മുതൽ എട്ടു വരെ മണിക്കൂർ സ്വസ്ഥമായി ഉറങ്ങുന്നവർക്ക് നല്ല പ്രതിരോധ ശേഷി കിട്ടാനുള്ള സാധ്യതയുണ്ട്. ടെൻഷനും പ്രതിരോധ ശേഷിയും തമ്മിൽ ബന്ധമുണ്ടെന്നാണ് ഹാർവാർഡ് യൂണിവേഴ്‌സിറ്റിയിലെ ആരോഗ്യവിദഗ്ദരുടെ കണ്ടെത്തൽ.
ജീവിതത്തിൽ പലതരം സ്‌ട്രെസുകളിലൂടെ കടന്നുപോകുന്നവരാണ് നമ്മൾ. ഈ സ്‌ട്രെസുകളെല്ലാം പ്രതിരോധശേഷിയെ ദോഷകരമായി ബാധിക്കുന്നു. അതുകൊണ്ട് ഉത്കണ്ഠ വിമുക്തമായ ജീവിതം പ്രതിരോധ ശേഷി കൂട്ടും.
എക്‌സർസൈസും പ്രതിരോധ ശേഷിയും തമ്മിൽ ബന്ധമുണ്ടെന്ന് ചില പഠനങ്ങൾ വ്യക്തമാക്കുന്നു. ദിവസം മുപ്പതു മിനിറ്റെങ്കിലും നടക്കുന്നവർക്ക് പ്രതിരോധ ശേഷി കൂടുതലായിരിക്കും.
മദ്യപാനത്തോട് നോ പറയുകയോ അല്ലെങ്കിൽ അത് പരിമിതപ്പെടുത്തുകയോ ആണ് മറ്റൊരു മാർഗ്ഗം.
