നെഞ്ചെരിച്ചില്‍ വരാതിരിക്കാനും, വന്നാല്‍ അതിനെ ശമിപ്പിക്കാനുമുള്ള ചില മാര്‍ഗ്ഗങ്ങള്‍ ഇതാ:-
- നെഞ്ചെരിച്ചില്‍ അനുഭവപ്പെടുമ്പോള്‍ ഉടന്‍തന്നെ ഒരു വാഴപ്പഴമോ, അതല്ലെങ്കില്‍ ആപ്പിള്‍ ജ്യൂസോ കഴിച്ചാല്‍ അല്‍പ്പം ആശ്വാസം കിട്ടും.
- കുപ്പിയില്‍ അടച്ചുവെച്ച ശീതളപാനീയങ്ങള്‍ വാങ്ങിക്കഴിക്കാതിരിക്കുക.
- രാത്രി കിടക്കുന്നതിനു മുമ്പായി വെള്ളം ചേര്‍ത്ത പാല്‍ മിതമായ ചൂടോടുകൂടി കുടിക്കാം.
- ഭക്ഷണം കഴിച്ചയുടന്‍തന്നെ കിടക്കരുത്. കുറഞ്ഞത് ഒരു മണിക്കൂറെങ്കിലും കഴിഞ്ഞ ശേഷമേ കിടക്കാവൂ. അത്താഴം കഴിച്ചു അല്‍പനേരം ഉലാത്തുന്നതും നല്ലതാണ്.
- നെഞ്ചെരിച്ചിലുള്ളപ്പോള്‍ ഒരിക്കലും സോഡ കുടിക്കരുത്. അത് നെഞ്ചെരിച്ചില്‍ വര്‍ദ്ധിപ്പിക്കയേയുള്ളൂ.
- വലിയ ഇടവേളയ്ക്ക് ശേഷം ഭക്ഷണം കഴിക്കുന്നതാണ് നെഞ്ചെരിച്ചില്‍ ഉണ്ടാവാനുള്ള പ്രധാന കാരണം. അതുകൊണ്ട് സമയാസമയം അല്‍പ്പമെങ്കിലും ഭക്ഷണം കഴിക്കുക.
- ഉപ്പിലിട്ടത്, അച്ചാര്‍, എരിവ് അധികമുള്ള ചമ്മന്തി, വിനിഗര്‍, മസാല എന്നിവയുടെ ഉപയോഗം കുറയ്ക്കുക.
- കോഴിയിറച്ചി, മീന്‍, മുട്ടയുടെ വെള്ള എന്നിവ കഴിക്കാം. എന്നാല്‍ അത് എണ്ണയില്‍ പൊരിച്ചു കഴിക്കരുത്.
- പുതിനയുടെ ഇല തിളപ്പിച്ച വെള്ളത്തിലിട്ടു ഭക്ഷണശേഷം കുടിക്കുന്നത് നല്ലതാണ്.
- ഭക്ഷണം കഴിച്ചയുടന്‍ നെഞ്ചെരിയുന്നതായി തോന്നുന്നുവെങ്കില്‍ അല്‍പ്പം ശര്‍ക്കര കഴിച്ചാല്‍ എരിച്ചലടങ്ങും. അതുപോലെ ചെറുനാരങ്ങ, ബദാം, തൈര് എന്നിവയും നല്ല ഫലമേകും.
- മുരിങ്ങയ്ക്ക, കാബേജ്, ബീന്‍സ്, പട്ടാണി, സവോള എന്നിവ വേവിച്ചു കഴിക്കാം.
- രാത്രികാലത്ത് നെഞ്ചെരിച്ചില്‍ അനുഭവപ്പെട്ടാല്‍ വയറുനിറയെ വെള്ളം കുടിക്കരുത്. മൂന്നു സ്പൂണ്‍ ഇഞ്ചിനീര് ഇടവിട്ട്‌ രണ്ടോ മൂന്നോ പ്രാവശ്യം കഴിച്ചാല്‍ നെഞ്ചെരിച്ചില്‍ ശമിക്കും. എരിവും പുളിയും കൊഴുപ്പുമില്ലാത്ത ഭക്ഷണം മിതമായ തോതില്‍ കഴിച്ചാല്‍തന്നെ രാത്രി നെഞ്ചെരിച്ചില്‍ ഉണ്ടാവില്ല.
- മദ്യപാനവും, പുകവലിയും പാടെ ഉപേക്ഷിക്കുക.
- വയറ്റില്‍ ഒരു പങ്കു ഭക്ഷണം, ഒരു പങ്ക് വെള്ളം, ഒരു പങ്ക് കാലിയിടം ഇങ്ങനെ ആയിരിക്കാന്‍ ശ്രദ്ധിച്ചാല്‍ നെഞ്ചെരിച്ചില്‍ മാത്രമല്ല ഒരു രോഗവും അടുക്കുകയില്ല.
