എന്തുമാത്രം അറിവുകളുടെ വിശാലമായ ലോകമാണ് നമുക്ക് ചുറ്റിനും. ഒരു വിരൽത്തുമ്പിൽ എന്തുമാത്രം അറിവുകൾ. എന്നിട്ടും എല്ലാം അറിയാവുന്നവരായി ആരെങ്കിലുമുണ്ടാവുമോ ഇവിടെ? എത്രയോ പരിമിതികളുടെയും പരിധികളുടെയും നടുവിലാണ് നാം ഓരോരുത്തരും ജീവിക്കുന്നത്. എന്നിട്ടും എനിക്കറിയാവുന്ന കാര്യങ്ങളുടെ പേരിൽ, അത് അറിഞ്ഞുകൂടാത്ത നിന്നോട് എന്തിനാണ് ഞാൻ അവജ്ഞ പുലർത്തുന്നത്? നിനക്കറിയാവുന്നതും എനിക്കറിഞ്ഞുകൂടാത്തതുമായ കാര്യങ്ങളുടെ പേരിൽ നീയെന്തിനാണ് എന്നോട് അവജ്ഞ പുലർത്തുന്നത്?
അറിവുകൾ ആപേക്ഷികമാണ്. എത്ര അറിവുള്ളവർക്കും അറി്ഞ്ഞുകൂടാത്ത ചിലകാര്യങ്ങളെങ്കിലും ഈ ലോകത്തിലുണ്ടാവും. അതാണ് അറിവിന്റെ വലുപ്പം. എന്നിട്ടും ചില കാര്യങ്ങളെക്കുറിച്ചുള്ള അറിവില്ലായ്മയുടെ പേരിൽ നാം പലപ്പോഴും പലരുടെയും നേരെ അയ്യേ വയ്ക്കുന്നു. എവിടെയോ വായിച്ചത് ഓർമ്മിക്കുന്നു ജ്ഞാനികളെന്ന് മറ്റുള്ളവർ വാഴ്ത്തുന്നവർ പോലും എല്ലാ കാര്യങ്ങളും മനസ്സിലാക്കുന്നില്ല. എന്നാൽ വിഡ്ഢികളാകട്ടെ എല്ലാ കാര്യങ്ങളും തനിക്കറിയാമെന്ന് വിശ്വസിക്കുന്നു.അവനവനെക്കുറിച്ചുള്ള അറിവാണ് ഏറ്റവും വലിയ അറിവ് എന്നാണ് പറയപ്പെടുന്നത്. സത്യത്തിൽ അതാണ് വലിയ സത്യവും. ആത്മജ്ഞാനം കൊണ്ട് നിറഞ്ഞവരാണ് അവർ.
പണ്ടുകാലങ്ങളിൽ ചിലരെന്തിനാണ് ലോകത്തിന്റെ തിക്കിലും തിരക്കിലും നിന്ന് മാറി മലമുകളുകളിൽ ഏകാന്തധ്യാനത്തിനായി പുറപ്പെട്ടിരുന്നത്. അവർ അവിടെ അവരെതന്നെ തിരിച്ചറിയുകയായിരുന്നു. സ്വയം മനസ്സിലാക്കുകയായിരുന്നു. ലോകം നല്കുന്ന അറിവുകൾ വച്ചുകൊണ്ട് ഒരാളും സ്വയം തിരിച്ചറിയുന്നില്ല. കാരണം ലോകത്തിന്റെ കണ്ണുകൾ ബാഹ്യമായവയാണ്. ആന്തരികമായ അറിവുകളാണ് ഒരാളെ ബലവാനും കരുത്തുറ്റവനുമാക്കുന്നത്. അതിന് വേണ്ടിയാണ് അത്തരക്കാർ ലോകത്തെയും മോഹത്തെയും വിട്ട് മലമുകളിലേക്ക് കുടിയേറിയത്.
തിരികെ അവർ ഇറങ്ങിവന്നത് ഒരിക്കലും കയറിപ്പോയതുപോലെയായിരുന്നില്ല. കൂടുതൽ തെളിച്ചമുള്ളവരായി… കൂടുതൽ പ്രകാശമുള്ളവരായി… അതുകൊണ്ടാണ് പിന്നീട് അവർ ഗുരുക്കന്മാരെന്ന് അറിയപ്പെട്ടത്. അവർ തന്റെ മാത്രമല്ല മറ്റുള്ളവരുടെയും ജീവിതങ്ങളെക്കുറിച്ച് അറിവുള്ളവരായി മാറി. എനിക്ക് എന്നെക്കുറിച്ച് അറിവില്ലെങ്കിൽ, ഞാൻ എന്നെ തിരിച്ചറിയുന്നില്ലെങ്കിൽ എനിക്കൊരിക്കലും ശാശ്വതമായ സമാധാനമോ മതിപ്പോ ഉണ്ടായിരിക്കുകയില്ല. നീ നിന്നെ അറിയുക. അതിലും വലിയ അറിവു മറ്റൊന്നില്ലെന്ന് തിരിച്ചറിയുക. അറിവു തിരിച്ചറിവാകുമ്പോൾ അവിടെ ജീവിതം കീഴ്മേലായി മറിയും. പിന്നെയൊരിക്കലും നമുക്ക് പഴയതുപോലെയായിരിക്കാൻ കഴിയുകയില്ല.
നിഷ്‌ക്രിയതയും നിരുത്തരവാദിത്വവും നമ്മെ വിട്ടുപോകും.ലോകത്തിന്റെ അറിവുകൾ ചിലപ്പോൾ നിന്നെ മറ്റുള്ളവരുടെ ആദരവിനു പാത്രമാക്കിയേക്കാം. പക്ഷേ നീ നിന്നെത്തന്നെ അറിഞ്ഞുതുടങ്ങുമ്പോൾ നീ ലോകത്തിന് മാതൃകയും ആശ്രയവുമാകും. അറിവിൽ നിന്ന് തിരിച്ചറിവിലേക്ക് നടക്കുക. അതിന് ഇത്തിരി ധ്യാനം… ഇത്തിരി ശ്രമം… അതിന് ഇവിടെ തുടക്കം കുറിക്കാം.
